اقبال کے زمانے میں مشینوں کی حکومت کا یہ عالم نا تھا جو ہمارے زمانے میں ہے۔ مرحوم نے نا جانے کیا کچھ جانچ لیا تھا اُس وقت جو ہمیں ابھی تک سمجھ نہیں آئی۔ اب تو مشینوں کی حکومت کا یہ عالم ہے کہ کل ہی ہمارے آئی فون نے اطلاع دی کہ "آپ کو پتا ہے کہ اگر آپ سڑیس میں ہیں تو قرآن مجید آپ کے سٹریس کو کم کرتا ہے"۔ ہم نے بھی اشرف المخلوق ہونے کا حق ادا کرتے ہوئے آئی فون کو جوابی اطلاع دی "جی مجھے علم ہے اس فائدے کا اور میں رابطے میں ہوں اپنے رب سے"۔
اس تمام اطلاعاتی مراسلت کا نتیجہ یہ نکلا کہ ہمیں اپنے فون سے شدید انس اور لگاوؐ محسوس ہوا۔ کسی زمانے میں انسان انسان کا خیر خواہ ہوتا تھا۔ جب سے انسان نے حکومت اور کاروبار کی خاطر انسانوں کی خریدوفروخت شروع کی تب سے خیر خواہی کے لیے کچھ مشینوں کو آٹو میٹک پر کردیا گیا۔ خریدوفروخت کرنے والوں کو خاص قسم کے انسان چاہیے تھے اور انسانوں کو سہارا۔ یہ ڈوبتے کو تنکے کا سہارا نہیں ہے۔ یہاں پر تو مشین ڈوبتے کو سیدھا ٓاسمان پر ایک ہی چھلانگ میں لے جاتی ہے اور اس تمام سفر میں جو ایک نقطے سے دوسرے تک ڈسپلیسمنٹ ہوتی ہے اُس میں انسان کی انسانیت کے طوطے اُڑ جاتے ہیں۔
دنیا بھر کے عالم فاضل طاقت ور انسان آجکل مشینوں کی قابلیت کے گواہ ہیں۔ اسی وجہ سے انسانوں پر محنت کرنا گھاٹے کا سودا ہے۔ سوچنے کی بات ہے کہ انھی مشینوں کی نقلی عقل نے انسانوں کی عقلی نقل کا نہایت لطافت سے قلع قمع کیا۔ اب الیکشن میں بھی انسانوں کی بے ایمانی کو ریگولیٹ کرنے کے لیے مشینیں بھرتی کی گئی ہیں کیونکہ بے ایمانی تو انسانوں میں ہے نا اب مشین بے چاری صرف خیر خواہی میں اُس کی مقدار اور شدت کی نشاندہی ہی کرسکتی ہے انسان کے دل کے اندر جا کر سیاہی کو تو نہیں مانجھ سکتی نا۔ شائد اسی لیے رب کریم نے انسانوں کی رہنمائی کے لیے انسان ہی کو چُنا۔
ایسی بے ایمانی کی ریگولیشن ہمارے ایمان دار بہن بھائیوں کو ایک آنکھ سے تو نہیں بھا رہی شائد دونوں سے بھا جائے۔
ہاں مگر یاد آیا ابھی کچھ دن قبل ہی اسی خیرخواہ فون نے اطلاع دی کہ اب انسانوں کے لیے نقلی دل بھی تیار کردیے گئے ہیں اور یہ نقلی دل اُن انسانوں کے لیے ہیں جن کے اصلی دل فیل ہوچکے ہیں۔ یہ دل فی الحال مدد گار دل ہیں ۔ یعنی یہ صرف تب تک سانس قائم رکھیں گے جب تک کوئی اصلی انسانی دل قابو نا آجائے۔
نقل اور اصل کی اس کھینچا تانی میں مروت کی قربانی ناگزیر تو نہیں۔۔۔؟
ہے نا!
صائمہ شیر فضل
Comments