اچھے؟ اچھا

اچھے؟ اچھا!

کچھ  پرانی اصطلاحات کے جدید( اچھے) معنی:

اچھا انسان:
جو  دیکھنے میں آپ کی آنکھوں کو مناسب لگے ، وہ بولے جو آپ سننا پسند کریں زیادہ تر اپنے کام سے کام رکھے اور آپ کے کسی بھی ناجائز فعل پر آنکھیں میچ لے!

اچھے رشتہ دار:
جو صرف کسی شادی یا مرگ پر نظر آئیں اور نا کچھ پوچھیں نا بتائیں

اچھا رشتہ ( لڑکا):
بہن بھائی ناپید ہوں ، زیادہ سے زیادہ کوئی ایک ہو تو خیر ہے۔ گھر اور گاڑی اپنی ہو۔ جیب بھاری ہو! ماں باپ کا نافرمان ہو تو اور بھی اچھا۔

اچھا رشتہ (لڑکی):
لمبی ہو ، گوری ہو، ناک درست ہو 😒،
پی ایج ڈی یا ایم بی بی ایس ڈاکٹر ہو، عمر ۲۲ سال سے زیادہ نا ہو، کماتی ہو، فرمانبردار ہو ، مدَر ٹریسہ ہو،   ریموٹ پر ایویلیبل ہو تو کیا ہی بات ہے!

اچھا کھانا:
تیل خوب ہو، مرچ تیز ہو ، رنگ لال ہو، گوشت کسی بھی چیز کا ہو ، ذائقہ خوب ہو۔ سجاوٹ بھر پور ہو اور اگر تین چار ہزار روپے سے اوپر کا ہو اور روپے کسی اور کے ہوں تو اور بھی اعلیٰ!

اچھی تعلیم:
عاجزی ندارد  ہو، علم ناپید، تکبُر شدید ہو، تحمل و برداشت    نیست ! فیشن ایبل حقارت مزاج میں شامل ہو۔ بداخلاقی کا میڈل ہو۔ ڈگری آئوی لیگ سے ہو۔ نوکری اعلی ہو ۔ اپنا کاروبار  ہو تو اور بھی اعلی!۔ ہر خیر کا ناقد ہو! بڑوں کی بے ادبی کے لیے اقبال  کے اشعار کا ناجائز فائدہ اُٹھانے کے گُر سے واقف ہو!
( اطلاعاً عرض ہےپیروں کے استاد آپ جیسے
نوجوانوں کے لیے نہیں لکھا گیا تھا!)

اچھا خاندان:
دو تین کنال پر گھر ہو،  شہر میں سارا خاندان بڑی بڑی پوزیشنیز پر متعین ہوں تاکہ جھوٹی شرافت کے گواہ موجود ہوں۔ اپنے کردار کالے ہوں مگر دوسروں کی کردارکشی منٹوں میں پیش کرنے کا گر آتا ہو۔ آپس میں  چاہے جان کے دشمن ہوں، لوگوں کے آگے اپنی نفرتوں پر  پردے ڈالنے کا فن  آتا ہو !

اچھا ووٹر:
لٹ جائے گا، برباد ہو جائے گا مگر ووٹ پھر  اُنھی کو ڈالے گا۔

اچھا پھر ۔۔۔
آپ سب کا اچھا ہو!